Жалезная заслона і ўрон рэліктаваму лесу. Прадстаўнікі міжнародных арганізацый ацанілі ўплыў польскай агароджы на Белавежскую пушчу

25 лютага, Камянецкі раён /Кар. БЕЛТА/. Прадстаўнікі міжнародных арганізацый у час візіту ў Брэсцкую вобласць наведалі нацыянальны парк "Белавежская пушча". Адзін з прыпынкаў дэлегацыя зрабіла паблізу пабудаванай на граніцы польскай агароджы, перадае карэспандэнт БЕЛТА.

Брэсцкую вобласць наведваюць прадстаўнікі міжнародных арганізацый - ААН, ПРААН, СААЗ. З дэлегацыяй у час двухдзённага візіту працуюць нацыянальны каардынатар па дасягненні мэт устойлівага развіцця, намеснік старшыні Савета Рэспублікі Сяргей Хаменка, старшыня Брэсцкага абласнога Савета дэпутатаў, член Савета Рэспублікі Ігар Брылевіч. Праграма даволі насычаная. Напярэдадні яны наведалі ўстановы адукацыі, аховы здароўя і культуры, спартыўныя комплексы ў Баранавічах, Кобрынскім і Камянецкім раёнах. Сёння раніцай пабывалі ў нацыянальным парку "Белавежская пушча". У тым ліку ўбачылі пункт пропуску "Перароў" і польскую агароджу, якая падзяліла пушчу на дзве часткі.

"У пункце пропуску "Перароў" быў упершыню ўведзены ў дзеянне бязвіз для замежных грамадзян, якія наведваюць Рэспубліку Беларусь. Тут іншаземцы маглі наведаць беларускую частку Белавежскай пушчы ў спрошчаным парадку. Гэта папулярна было ў пешаходаў і веласіпедыстаў. Грамадзяне наведвалі з самых розных дзяржаў: не толькі бліжэйшых з Еўрапейскага саюза, але і даволі аддаленых, такіх як Новая Зеландыя, Аўстралія, Эквадор, Канада і шмат іншых. Трэба адзначыць, што маршрут карыстаўся вялікай папулярнасцю. Здольнасць пункта пропуску прадугледжвала пропуск да 400 чалавек кожныя суткі. У сезон такая колькасць людзей і прыбывала. На жаль, у сакавіку 2020 года па ініцыятыве польскага боку ў сувязі з пандэміяй рух спыніўся і нягледзячы на ўсе прапановы беларускага боку да гэтага часу не аднаўляўся", - звярнуў увагу афіцыйны прадстаўнік Брэсцкай пагранічнай групы Сяргей Дзмітрыеў.

Ён дадаў, што на ўсёй працягласці беларуска-польскай граніцы цяпер функцыянуе толькі адзін пасажырскі пункт пропуску - "Брэст". "Пры гатоўнасці польскага боку мы былі б рады аднавіць рух і ў астатніх пунктах пропуску, што дало б магчымасць наведаць нашу краіну і ўбачыць нашу гасціннасць грамадзянам іншых дзяржаў. Менавіта гэту пазіцыю мы хацелі сёння данесці да прадстаўнікоў міжнародных арганізацый, падкрэсліць адкрытасць беларускага боку і гатоўнасць пайсці насустрач прапановам сумежнага боку", - сказаў Сяргей Дзмітрыеў.

Адзін з прадстаўнікоў міжнародных арганізацый заўважыў, што раней гаварылі аб узвядзенні СССР жалезнай заслоны. Польскую агароджу ён назваў рэальнай жалезнай заслонай. Рэліктаваму лесу Белавежскай пушчы і яе жыхарам яна нанесла адчувальны ўрон. "Змяненні ў большасці адбыліся ў адзін момант у час будаўніцтва. Калі палякі будавалі дарогу і агароджу, яны высеклі ўчастак лесу, тым самым парушылі глебавае покрыва. Дарогай зрабілі штучную дамбу, якая стварыла блакіраванне руху паверхневых вод і, зразумела, выклікала парушэнні гідралагічнага рэжыму. У далейшым чакаецца пагаршэнне генафонду папуляцыі дзікіх жывёл, паколькі агароджа стварае бар'ер і блакіруецца іх міграцыя. Да таго ж пры будаўніцтве дарогі яна стала мостам для ўнясення ў Белавежскую пушчу вялікай колькасці інвазіўных відаў", - заўважыў начальнік навуковага аддзела нацыянальнага парку "Белавежская пушча" Вячаслаў Краўчук. Транспарт, які прыязджаў на граніцу, на колах стаў пераносчыкам насення "чужынцаў". Сярод іх - сумнік канадскі, бальзамін драбнакветкавы і іншыя віды.

У польскай агароджы зроблены брамкі для дзікіх жывёл. На ўсёй адлегласці іх крыху больш за два дзясяткі. Аднак звяры да іх не прывязаны. Яны прытрымліваюцца раней пракладзеных сцяжын, па якіх хадзілі гадамі.

"Ужо неаднаразова мы звярталіся ў Цэнтр сусветнай спадчыны ЮНЕСКА, каб яны прыклалі намаганні, паўплывалі неяк на польскі бок, на польскі ўрад. У красавіку мінулага года ў Белавежскую пушчу прыбыла сумесная місія ЮНЕСКА/МСАП. Эксперты склалі справаздачу аб негатыўным уплыве гэтай агароджы і далі каля 15 рэкамендацый, з якіх амаль усе былі накіраваны польскаму боку. Былі выстаўлены розныя патрабаванні, якія трэба было рэалізаваць для таго, каб хаця б знізіць негатыўны ўплыў гэтай агароджы", - расказаў Вячаслаў Краўчук. Рэкамендацыі экспертаў прыняты на сесіі Камітэта сусветнай спадчыны ЮНЕСКА, якая адбылася ў мінулым годзе ў Нью-Дэлі. Беларусы чакаюць вынікаў, якія дзеянні ажыццявіць польскі бок. "Штогод у Цэнтр сусветнай спадчыны падаецца справаздача аб захаванасці аб'екта. З нашага боку справаздача прадастаўлена. Аб польскай справаздачы мы пакуль не ведаем. Не бачылі, што яны там напісалі", - рэзюмаваў начальнік навуковага аддзела нацпарку.-0-

Фота Віялеты Южаковай